«Բոլորին դեմ եմ»–ը «ժողովրդի զահլայի» արձանը տեղադրեց Ռադիոտան մոտ

ԱԺ ընտրություններին մասնակցելու հայտ ներկայացրած «Բոլորին դեմ եմ» կուսակցությունը քարոզարշավի շրջանակում յուրօրինակ ակցիա է իրականացրել Հայաստանի հանրային ռադիոընկերության շենքի դիմաց։ Կուսակցության անդամները Ռադիոտան մոտ տեղադրել են «ժողովրդի զահլայի» 500 կիլոգրամանոց արձանը։

Կուսակցության ներկայացուցիչների պնդմամբ՝ իրենց քայլերում որևէ կատակ չկա, և ամեն ինչ կատարելապես լուրջ է։ «Մեր քարոզարշավը նպատակ ունի ցույց տալու, թե իրական քաղաքական պրոցեսները ՀՀ–ում ինչպես են տեղի ունենում։ Այսօրվանից պետք է այնպես լինի, որ մեր բոլորիս զահլան չկարողանան տանել, իսկ դրա լավագույն ձևը մեզ քվեարկելն է»,– հայտարարել են ակցիայի կազմակերպիչները՝ միաժամանակ հորդորելով ոստիկանությանը հետևել, որպեսզի որևէ մեկը չվնասի կամ չտեղաշարժի արձանը։

Ակցիային ներկա «Բոլորին դեմ եմ» կուսակցության վարչապետի թեկնածու Նինա Կարապետյանցն ընդգծել է, որ արձանի ծանրությունը խորհրդանշում է, թե գործող իշխանություններն ինչ աստիճանի են սպառել հանրության համբերությունը։

«Սա է այն ծանրակշիռ, հասարակության համար զզվեցնող, թթվի քար դարձած զահլեն։ Հասարակությանն ուզում ենք ասել` սա վերջին զահլեն է լինելու, եթե անգամ գան, վերցնեն ու տանեն, ապա սա կլինի վերջինը։ Պետական բյուջեով որ զահլեքս տարել են, թող հավաքեն այս զահլեն էլ տանեն»,– հայտարարել է Կարապետյանցը։