ԱԺ նիստը չկայացավ 104 բացակայի պատճառով. ովքե՞ր են 3 «գերազանցիկները»

 ՀՀ ԱԺ 8-րդ գումարման տասնմեկերորդ նստաշրջանի հերթական նիստն այսօր ևս չկայացավ քվորում չլինելու պատճառով։

 

Բացակա էին 104 պատգամավորներ, գրանցվել էին ընդամենը 3-ը՝ ԱԺ փոխխոսնակ Հակոբ Արշակյանը, նախկին ՔՊ-ական, ներկայում անկախ պատգամավորներ Հովիկ Աղազարյանն ու Հակոբ Ասլանյանը։ ԱԺ կանոնակարգ օրենքով քվորում ապահովվելու համար պետք է լինի առնվազն 54 պատգամավոր։

 

«Նախընտրական պայքարի այս փուլում պատգամավորներն իրենց բնակավայրերում քաղաքացիներին հնարավորություն ունեն ներկայացնելու իրենց հաշվետվություններն ու ակնկալելու վստահություն նոր կառավարության կազմման հարցում»,- ասաց Արշակյանը՝ հեռուստադիտողների համար մեկնաբանելով պատգամավորների բացակայությունը:

 

Հատկանշական է՝ այսօր նիստին գրանցված 3 պատգամավորներն էլ հաջորդ գումարման ԱԺ-ում չեն լինելու։

 

Հակոբ Արշակյանն արդեն հայտարարել է քաղաքականությունից հեռանալու և մասնավոր հատվածում գործունեություն ծավալելու մասին, իսկ Հովիկ Աղազարյանն ու Հակոբ Ասլանյանն իրենց ստեղծած կուսակցությունով ընտրություններին մասնակցող որևէ ուժի նախընտրական ցուցակում տեղ չստացան։