Ավտովթար՝ Կոտայքի մարզում. ՀՀ ՊՆ նախկին շենքի մոտ բախվել է 3 ավտոմեքենա

Մայիսի 25-ին Կոտայքի մարզում՝ Երևան-Աշտարակ ավտոճանապարհին, տեղի է ունեցել ավտովթար՝ երեք տրանսպորտային միջոցների մասնակցությամբ, այս մասին հայտնում է Shamshyan.com-ը։

Դեպքի հետևանքով ճանապարհահատվածում առաջացել էր խոշոր խցանում, որը հասնում էր մինչև Արագածոտնի մարզ։

Ըստ ֆոտոլրագրող Գագիկ Շամշյանի՝ վարորդները երկար ժամանակ սպասել են ապահովագրական ընկերությունների ներկայացուցիչներին, սակայն վերջիններս չեն ժամանել։ Իրավիճակին արագ արձագանքել են ոստիկանության պարեկային ծառայության Կոտայքի մարզի գումարտակի պարեկները, որոնք տեղում ձևակերպել են վթարը և վերականգնել երթևեկությունը։

Խցանման մեջ մնացած վարորդները շնորհակալություն են հայտնել պարեկներին՝ օպերատիվ աշխատանքի համար։