Արտամետի՝ Գուրգեն Մարգարյանի անվան ավագ դպրոցի փակման մասին համացանցում տարածված տեղեկությունը չի համապատասխանում իրականությանը

Արտամետի վարչական ղեկավար Գոռ Ղազարյանը վստահեցրել է, որ Արտամետի Գուրգեն Մարգարյանի անվան ավագ դպրոցը չի փակվելու և շարունակելու է գործել, այս մասին հայտնում է Factor.am-ը։

Նրա խոսքով՝ համայնքում տեսել էին ԿԳՄՍ նախարարության կողմից միավորման ենթակա դպրոցների ցանկը, որտեղ ընդգրկված էր նաև Արտամետի ավագ դպրոցը։ Դրանից հետո բնակիչները դիմել են տարբեր կառույցների, այդ թվում՝ վարչապետի աշխատակազմ։

«Մոտ մեկ ամիս առաջ պաշտոնական պատասխան ենք ստացել, որ դպրոցը չի փակվելու և միավորում չի լինելու»,- նշել է Ղազարյանը։

Նա հավելել է, որ գյուղում այժմ կա 35 աշակերտ, որոնցից երկուսը հաճախում են նախակրթարան։ Նախատեսվում էր դպրոցը միավորել Վանանդ գյուղի դպրոցի հետ, որտեղ նոր շենք է կառուցվում, և արտամետցի երեխաները պետք է այնտեղ հաճախեին։

Գոռ Ղազարյանի խոսքով՝ դպրոցի անվանափոխության հարց ընդհանրապես չի քննարկվել։

Հիշեցնենք, որ ավելի վաղ «Ուժեղ Հայաստան» դաշինքի ընտրական ցուցակը գլխավորող Նարեկ Կարապետյանը ֆեյսբուքյան գրառմամբ հայտարարել էր, թե «ՔՊ-ն փակում է Գուրգեն Մարգարյանի անվան դպրոցը»։