Արտակարգ դեպք՝ Նոր Գեղի բնակավայրում․ ընթացող «Tesla»-ում հրդեհ է բռնկվել․

Այսօր՝ ապրիլի 20-ին, արտակարգ դեպք է տեղի ունեցել Կոտայքի մարզում։ Ժամը 19։00-ի սահմաններում Նոր Հաճն-Նոր Գեղի ավտոճանապարհին, Նոր Գեղի բնակավայրի վարչական տարածքում հրդեհ է բռնկվել ընթացող «Tesla» մակնիշի ավտոմեքենայում հայտնում է shamshyan.com-ը:

Նախնական տվյալներով՝ տուժածներ չկան։ Մինչ հրշեջ-փրկարարների ժամանումը, վարորդն ու քաղաքացիները փորձել են կանխել կրակի տարածումը։

Դեպքի վայր են ժամանել Աբովյանի և Եղվարդի հրշեջ-փրկարարական ջոկատները, ինչպես նաև ոստիկանության պարեկային ծառայության և համայնքային ոստիկանության օպերատիվ խմբերը։ Անվտանգությունից ելնելով՝ ճանապարհահատվածում երթևեկությունը ժամանակավորապես դադարեցվել է հայտնում է Գագիկ Շամշյանը:

Չնայած հրշեջների միջամտությանը՝ կրակը մի քանի անգամ մարվել է, սակայն կրկին բռնկվել է, և ծուխը տեսանելի է եղել մի քանի հարյուր մետրից։

Այս պահին իրավապահները պարզում են ավտոմեքենայի սեփականատիրոջ և վարորդի ինքնությունը։