Արտակարգ դեպք՝ Երևանում. «Էլիտ Պլազա»-ում գործող «Արտ Լանչ»-ի խոհանոցից հոսանքահարված վիճակում հիվանդանոց է տեղափոխվել մի տղամարդ

Երևանում մայիսի 18-ին արտակարգ դեպք է տեղի ունեցել Խորենացի փողոցի 15 հասցեում գործող «Էլիտ Պլազա» կենտրոնում, այս մասին հայտնում է Shamshyan.com-ը։

Ժամը 12:50-ի սահմաններում շտապօգնության խումբը Կոտայքի մարզի 55-ամյա բնակիչ Ս. Կ.-ին տեղափոխել է Հերացու անվան թիվ 1 համալսարանական հիվանդանոց՝ «Էլիտ Պլազա»-ում գործող «Արտ Լանչ» սննդի կետի խոհանոցում ստացած էլեկտրահարումից հետո։

Ըստ նախնական տվյալների՝ տղամարդը հոսանքահարվել է էլեկտրական ջեռոցից։ Դեպքի վայր են ժամանել ՆԳՆ ոստիկանության Կենտրոնական բաժնի ծառայողները։

Դեպքի փաստով կազմված նյութերը փոխանցվել են ՀՀ քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական բաժին։