Արթիկում քաղաքացիներին գումարով հանրահավաքի տանելու գործով՝ երկու անձ է ձերբակալվել

Համայնքային ոստիկանության Արթիկի բաժնի ծառայողները, իրացնելով մայիսի 14-ին ստացած տեղեկությունները, պարզել են, որ Արթիկ քաղաքի բնակիչ 28-ամյա երիտասարդը ապրիլի 11-ին կուսակցություններից մեկի կազմակերպած հանրահավաքին մասնակցելու համար մի խումբ համաքաղաքացիների, գումարի դիմաց, իր «Նիսան» մակնիշի մեքենայով տարել է Երևան, ապա հանրահավաքի ավարտին` Արթիկ տեղափոխելուց հետո, տվել է խոստացված գումարը, այս մասին հայտնում է ՆԳՆ ոստիկանությունը։

Ըստ իրավապահների՝ 28-ամյա երիտասարդը ապրիլի 11-ին իր մեքենայով չորս համաքաղաքացու տեղափոխել է Երևան՝ կուսակցություններից մեկի  կայանալիք հանրահավաքին մասնակցելու նպատակով։

Նրա խոսքով՝ 34-ամյա համաքաղաքացին յուրաքանչյուր մասնակցի համար խոստացել էր վճարել 20 հազար դրամ։

Հանրահավաքից հետո փոխանցվել է խոստացված 100 հազար դրամը, որը բաժանվել է մասնակիցներին։ Դեպքի առթիվ նախաձեռնվել է քրեական վարույթ, երկու երիտասարդների նկատմամբ հարուցվել է հանրային քրեական հետապնդում։