Արմեն Գրիգորյանը շուտով գիրք կներկայացնի "Մերժիր Սերժին" նախաձեռնության ձևավորման և փողոցային պայքարի մասին

ՀՀ ԱԽ քարտուղար Արմեն Գրիգորյանը գրառում է կատարել այն գրքի ավարտի մասին, որը ներկայացնում է «Մերժիր Սերժին» շարժման ձևավորումը, փողոցային պայքարը և անձնական ապրումները՝ ընդգծելով, որ այն ընդհանուր պատմություն է բոլորի համար։

ՀՀ Անվտանգության խորհրդի քարտուղար Արմեն Գրիգորյանն իր ֆեյսբուքյան հարթակում գրառում է կատարել, այն մասին որ հեղափոխության իր փորձառությունը, նա իր խոստացածի պես ամփոփել է գրքի տեսքով և այն շուտով կներկայացնի հանրությանը։

"Ճանապարհը սպասվածից ավելի երկար ստացվեց, սակայն այսօր արդեն վստահությամբ կարող եմ ասել՝ աշխատանքն ավարտված է: Գիրքն արդեն պատրաստ է և այն շուտով կներկայացնեմ ձեր դատին:

Այն պարզապես հուշագրություն չէ. այն պատմություն է «Մերժիր Սերժին» նախաձեռնության ձևավորման, փողոցային պայքարի և այն ներքին ապրումների մասին, որոնք ունեցել եմ թե՛ փողոցում, թե՛ Հատուկ քննչական ծառայության մեկուսարանում։",– ասում է ԱԽ քարտուղարը։

Արմեն Գրիգորյանը հիշեցնում է, որ ինչպես նախկինում էր նշել՝ այդ օրերի մասին յուրաքանչյուրն ունի իր պատմությունը, և յուրաքանչյուր այդ պատմությունը, լինելով մեկ մարդու անձնական փորձառություն, իրականում բոլորինն է։
«Այդ իսկ պատճառով կարծում եմ, որ հեղափոխության մասին իմ հայացքով ներկայացված այս պատմության մեջ յուրաքանչյուրն այդ օրերին կգտնի իրեն», – նշում է Գրիգորյանը։

Նա նաև շնորհակալություն է հայտնում ընթերցողներին համբերության համար՝ հավելելով, որ գրքի վերաբերյալ մանրամասները կներկայացվեն շատ շուտով։