Առաջիկայում Հայաստանի և Թուրքիայի հարաբերությունների ամբողջական կարգավորում կունենանք․ Միրզոյան

ՀՀ արտաքին գործերի նախարար Արարատ Միրզոյանը հայտարարել է, որ Հայաստանի և Թուրքիայի միջև հարաբերությունների կարգավորման գործընթացը շարունակվում է, և առաջիկայում հնարավոր է արձանագրել նոր առաջընթաց։

«Արմենպրես»-ի հաղորդմամբ՝ԱԺ մշտական հանձնաժողովների համատեղ նիստում 2025 թվականի պետական բյուջեի կատարման տարեկան հաշվետվության քննարկման ժամանակ նախարարն անդրադարձել է Հայաստան-Թուրքիա երկխոսությանը և վերջին շրջանում իրականացված աշխատանքներին։

«Թուրքիայի հետ մեր երկխոսությունն է շարունակվել, տեղի են ունեցել Գյումրի-Կարս երկաթուղու վերագործարկման ուղղությամբ ստեղծված աշխատանքային խմբի հանդիպումներ, մի շարք այլ հանդիպումներ»,-ասել է Միրզոյանը։

Միրզոյանի խոսքով՝ հարաբերությունների կարգավորման գործընթացում առաջիկայում հնարավոր են շոշափելի արդյունքներ։

«Իմ ակնկալիքը և կարծիքն այն է, որ շատ մոտ ապագայում մենք ինչ-որ փուլում շոշափելի առաջընթաց կունենանք Թուրքիայի հետ մեր հարաբերությունների ամբողջական կարգավորման առումով»,-նշել է նախարարը։

Արարատ Միրզոյանը վստահություն է հայտնել՝ կարգավորման գործընթացը կհասնի իր տրամաբանական ավարտին։

«Ուզում եմ վստահություն հայտնել, որ առաջիկայում, ըստ էության, ամբողջական կարգավորում կունենանք»,-հայտարարել է նա։

Արտաքին գործերի նախարարը նաև նշել է, որ երկու երկրների միջև արդեն գոյություն ունի ուղիղ առևտուր։

«Միայն վերջին իրադարձությունը նշեմ։ Չնայած այն չի վերաբերում հաշվետու ժամանակահատվածին, մենք այժմ Հայաստանի և Թուրքիայի միջև ունենք ուղիղ առևտուր՝ մաքսային իմաստով ուղիղ, աշխարհագրորեն, թեև դրանք դեռևս տեղի են ունենում երրորդ երկրների տարածքով»,-ասել է Միրզոյանը։