Արարատ Միրզոյանը մասնակցել է ԵՄ արտաքին գործերի նախարարների խորհրդի ձևաչափով հանդիպմանը և քննարկել ՀՀ-ԵՄ համագործակցության խորացումը

ՀՀ ԱԳ նախարար Արարատ Միրզոյանը ԵՄ ԱԳԱՔ բարձր ներկայացուցիչ Կայա Կալասի հրավերով մասնակցել է ԵՄ արտաքին գործերի նախարարների խորհրդի ձևաչափով աշխատանքային հանդիպմանը, այս մասին հայտնում է ՀՀ Արտաքին գործերի նախարարությունը։

Քննարկմանը մասնակցել են նաև ԵՄ ընդլայնման հարցերով հանձնակատար Մարթա Կոսը և ԵՄ անդամ երկրների արտաքին գործերի նախարարները։

ԵՄ գործընկերները շնորհավորել են Հայաստանին վերջին խորհրդարանական ընտրությունների և դրանց արդյունքների կապակցությամբ՝ ընդգծելով ԵՄ աջակցությունը ՀՀ-ԵՄ գործընկերության խորացմանը և Հայաստանի եվրոպական ինտեգրման գործընթացին։

Արարատ Միրզոյանը ներկայացրել է Հայաստանի ներքաղաքական և տարածաշրջանային զարգացումները՝ ընդգծելով քաղաքացիների հանձնառությունը խաղաղության, ինքնիշխանության և ժողովրդավարական բարեփոխումների շարունակականության նկատմամբ։

Քննարկվել են նաև ՀՀ-ԵՄ համագործակցության ընդլայնումը, առևտրաշրջանառության աճը, տնտեսական և էներգետիկ դիմակայունության ամրապնդումը, ինչպես նաև հիբրիդային սպառնալիքներին հակազդելու ուղղությունները։