Արարատ Միրզոյան․ Հայաստանը չի ցանկանում լարվածություն Հայաստան–Ռուսաստան հարաբերություններում

ՀՀ արտաքին գործերի նախարար Արարատ Միրզոյանը լրագրողների հետ զրույցում հայտարարել է, որ Հայաստանը որևէ ցանկություն չունի լարվածություն մտցնելու Հայաստան–Ռուսաստան հարաբերություններում՝ ոչ քաղաքական երկխոսության, ոչ տնտեսական համագործակցության, ոչ էլ բազմակողմ հարթակներում։

Նրա խոսքով՝ առաջացած կամ հնարավոր բոլոր խնդիրները Երևանը պատրաստ է քննարկել կառուցողական և գործընկերային մթնոլորտում՝ նպատակ ունենալով գտնել փոխընդունելի լուծումներ։

Միրզոյանը նաև նշել է, որ փորձ է արվում առկա խնդիրները կապել ընտրությունների կամ ԵՄ հարաբերությունների հետ, ինչը, նրա խոսքով, չի համապատասխանում իրականությանը։

«Այս տեսակ խնդիրներ եղել են մշտապես»,– ասել է նա։