Ակնկալվում է, որ ԵՄ անդամ երկրները Հայաստան կուղարկեն Հիբրիդային սպառնալիքներին արագ արձագանքման խումբ

Եվրամիության անդամ երկրների արտգործնախարարներն անցած շաբաթ հավանություն են տվել Հայաստան հիբրիդային սպառնալիքներին արագ արձագանքման խումբ ուղարկելու նախաձեռնությանը, հայտնում են «Ազատության» Բրյուսելի աղբյուրները։ Ավելի վաղ հայտնի էր դարձել, որ հունիսի 7-ին սպասվող խորհրդարանական ընտրություններին ընդառաջ ՀՀ արտգործնախարար Արարատ Միրզոյանը նամակով դիմել էր ԵՄ-ին՝ կանխելու համար հիբրիդային սպառնալիքները։ Նոր առաքելությունը բաղկացած կլինի 9–14 մասնակիցից, և նրանց հիմնական նպատակն է պայքարել արտաքին տեղեկատվական մանիպուլյացիաների, միջամտությունների և կիբերսպառնալիքների դեմ, խորհրդատվություն տալ կառավարությանը, օգնել ընտրական ապօրինի ֆինանսավորման դեպքերի հայտնաբերման և հանրային իրազեկվածության բարձրացման հարցերում։ Առաքելությունն ակնկալվում է տեղակայվել Հայաստանում մարտի վերջին կամ ապրիլի սկզբին՝ 10–15 աշխատանքային օրով, և ավարտին կհստակեցվի Բրյուսելի հետագա գործողությունների ուղղությունը՝ հնարավոր ԵՄ լիարժեք քաղաքացիական առաքելության համար։

Սրան զուգահեռ, Եվրոպական արտաքին գործողությունների ծառայությունը ներկայացրել է «Հայաստանի համար ճգնաժամային մոտեցման քաղաքական շրջանակ» (PFCA) փաստաթուղթը, որը հավանություն է տալիս նոր՝ Անվտանգության և պաշտպանության ընդհանուր քաղաքականության առաքելության ստեղծմանը Հայաստանում՝ շեշտելով Հայաստանի հետ հարաբերությունների զարգացումը և երկրի տեսանելի ազատումը ծայրահեղականացնող և օտար միջամտություններից։ Փաստաթղթում նշվում է, որ Հայաստանի հիմնական ճգնաժամային մարտահրավերը Ռուսաստանի ազդեցությունն է՝ ռուսական ռազմաբազան, սահմանապահներն ու տնտեսական կապերը, ինչպես նաև էներգետիկ և հեռահաղորդակցական ենթակառուցվածքների վերահսկողությունը։ Կրեմլն օգտագործում է տարածաշրջանային լարվածությունն ու վախերը՝ Հայաստանի վրա ճնշում գործադրելու համար, և առանց ԵՄ ակտիվության Հայաստանը դժվարությամբ կարող է աստիճանաբար դուրս գալ Մոսկվայի ազդեցության դաշտից։

Փաստաթղթում նաև նշվում է, որ արագ արձագանքման խումբը և ընդհանուր անվտանգության նոր առաքելությունը կօգնեն պաշտպանել երկրի ինքնուրույն ռազմավարական կողմնորոշումը, ապահովել ընտրությունների խիստ ու թափանցիկ ընթացքը և նվազեցնել արտաքին միջամտությունների ու ապատեղեկատվության ռիսկերը։