ԱԽ քարտուղարն ու ԵՄ դիտորդական առաքելության ղեկավարը քննարկել են հետագա համագործակցությունը

Հուլիսի 16-ին ՀՀ Անվտանգության խորհրդի քարտուղար Արմեն Գրիգորյանն ընդունել է Հայաստանում Եվրոպական միության քաղաքացիական առաքելության ղեկավար Սատու Կոյվուին։ Այս մասին հայտնում են ԱԽ գրասենյակի լրատվական ծառայությունից:

Հանդիպման ընթացքում կողմերը կարևորել են իրականացվող առաքելության դերը և վերահաստատել գործընկերությունը շարունակելու հանձնառությունը.

Արմեն Գրիգորյանը բարձր է գնահատել ԵՄ քաղաքացիական առաքելության գործունեությունը Հայաստանում և ընդգծել, որ հայկական կողմը հաստատակամ է շարունակելու արդյունավետ համագործակցությունը: Սատու Կոյվուն շնորհակալություն է հայտնել ընդունելության համար և բարձր գնահատել ՀՀ պետական կառույցների հետ արդեն իսկ ձևավորված գործնական փոխգործակցությունը:

Զրուցակիցներն անդրադարձել են նաև առաքելության ընթացիկ գործունեությանը և հետագա համագործակցությանն առնչվող ծրագրային հարցերին։