Ադրբեջանն ուսումնասիրում է ՄԱԿ-ի և ՆԱՏՕ-ի գործողություններին մասնակցելու հեռանկարները․Զաքիր Հասանով

1999 թվականից ի վեր Ադրբեջանական բանակի ավելի քան 3000 զինծառայող մասնակցել է աշխարհի տարբեր երկրներում խաղաղապահ գործողությունների, գրում են ադրբեջանական լրատվամիջոցները։

Ադրբեջանի պաշտպանության նախարար Զաքիր Հասանովը այս մասին նշել է Միջազգային հարաբերությունների վերլուծության կենտրոնի հետ համատեղ պատրաստված Ադրբեջանական բանակի խաղաղապահ գործողությունների վերաբերյալ զեկույցի նախաբանում։

Նա նշել է, որ ադրբեջանական խաղաղապահների աշխատանքը մշտապես բարձր գնահատականի է արժանացել հրամանատարության, տարբեր երկրների և միջազգային կազմակերպությունների կողմից։

«Տարբեր տարածաշրջաններում տեղի ունեցող անկայուն աշխարհաքաղաքական գործընթացները և հակամարտությունները ցույց են տալիս, որ խաղաղապահների դերը մեծանում է։ Ադրբեջանը, որպես միջազգային հանրության և ՄԱԿ-ի անդամ, աջակցում է խաղաղության և համաշխարհային անվտանգության պահպանման բոլոր նախաձեռնություններին։ Ներկայում, մենք ուսումնասիրում ենք ադրբեջանական բանակի մասնակցության հնարավորությունը ՄԱԿ-ի և ՆԱՏՕ-ի կողմից միջազգային խաղաղության պահպանմանը նպաստելու համար անցկացվող տարբեր գործողություններին», - ասել է Հասանովը։

Նա ընդգծել է, որ քաղաքական որոշումները, երկրի կամքը և խաղաղապահ ուժերի ներդրումը ամրապնդել են Ադրբեջանի հեղինակությունը որպես հուսալի գործընկեր և խաղաղասեր երկիր, գրում են ադրբեջանական ԶԼՄ-ները։