Աբովյանում ծննդատան նախկին տնօրենը դանակահարված տեղափոխվել է հիվանդանոց

Այսօր՝ մայիսի 23-ին, արտակարգ դեպք է տեղի ունեցել Կոտայքի մարզում։ Ժամը 15:30-ի սահմաններում իրավապահները տեղեկություններ են ստացել, որ Աբովյան քաղաքի Հատիսի փողոցում՝ տեղի ծննդատան հարևանությամբ գործող «Լվա ինքդ» ավտոլվացման կետում, վիճաբանություն է տեղի ունեցել, որի ժամանակ մեկ քաղաքացու դանակի մի քանի հարված են հասցրել։

Ֆոտոլրագրող Գագիկ Շամշյանի հաղորդմամբ՝ դեպքի վայր ժամանած ոստիկաններն ու քննիչները ավտոլվացման կետում հայտնաբերել են արնանման հետքեր։

Օպերատիվ տվյալներով պարզվել է, որ դանակահարվածը Կոտայքի մարզի բնակիչ Նորայր Միքայելյանն է։ Նրան «Hyundai Elantra» մակնիշի ավտոմեքենայով ծայրահեղ վիճակում տեղափոխել են «Աբովյան» բժշկական կենտրոն։

• Քրեական և համայնքային ոստիկաններն ու քննիչները հիվանդանոցի բակում հայտնաբերել են նշված «Hyundai Elantra»-ն, որի նստատեղերին և աջակողմյան դռների վրա առկա են եղել արյան բազմաթիվ հետքեր։

•  Դեպքի վայրում հավաքված քաղաքացիների փոխանցմամբ՝ միջադեպի մասնակիցները մինչ այդ մասնակցելիս են եղել հացկերույթի, որից հետո իջել են ավտոլվացման կետի տարածք, որտեղ էլ բռնկվել է կռիվը։ Ականատեսները նաև հայտնել են, որ վիրավորը հանդիսանում է Աբովյանի ծննդատան նախկին տնօրենը։

Դեպքի փաստով ՀՀ Քննչական կոմիտեի Կոտայքի մարզային քննչական վարչության Աբովյանի քննչական բաժնում նախաձեռնվել է քրեական վարույթ։ Ոստիկանությունն ու քննչական բաժինը ձեռնարկում են անհրաժեշտ միջոցառումներ՝ հանցագործությունը կատարած անձի (կամ անձանց) ինքնությունը պարզելու և նրանց ու հանցագործության գործիք դանակը հայտնաբերելու ուղղությամբ։