2027 թվականից ԵՄ-ում վաճառվող սմարթֆոններն ու պլանշետները կդառնան փոխարինելի մարտկոցներով

Այսօրվա հեռախոսների և պլանշետների մեծ մասը հերմետիկ փակված դիզայնով է, մարտկոցները սոսնձված են և դժվար է հանել կամ փոխարինել դրանք։ Սա կարող է փոխվել 2027 թվականից, գրում է Business standard-ը:
Մարտկոցների վերաբերյալ ԵՄ կանոնակարգի համաձայն՝ հեռախոսները, պլանշետները և անլար բջջային հեռախոսները պետք է նախագծվեն այնպես, որ մարտկոցները հնարավոր լինի հանել և փոխարինել՝ առանց սարքը կամ մարտկոցը վնասելու: Կանոնն ուժի մեջ է մտնելու 2027 թվականի փետրվարի 18-ին :

 Ըստ նոր կանոնակարգի , մարտկոցները պետք է լինեն և՛ հանվող, և՛ փոխարինելի։ Սա նշանակում է, որ օգտատերերը պետք է կարողանան դրանք անվտանգ հանել՝ առանց սարքը վնասելու, և փոխարինել մեկ այլ սարքով՝ առանց ազդելու աշխատանքի կամ անվտանգության վրա։  ԵՄ-ի կողմից մարտկոցների վերաբերյալ կանոնակարգը ոչ միայն կարգավորող փոփոխություն է ,այլև սարքերի նախագծման, սպասարկման եղանակի վերանայում: Սպառողների համար այդ սարքերը կդառնան ավելի դիմացկուն, երկարակյաց և հեշտ վերանորոգվող: