18-ամյա երիտասարդը բանկում ձևակերպել է ոսկու գրավով վարկ․ պարզվել է՝ ոսկին կեղծ է

Ապրիլի 8-ի խարդախության դեպք է տեղի ունեցել Երևանում։ Ժամը 18։10-ի սահմաններում ՀՀ Ներքին գործերի նախարարության ոստիկանության համայնքային ոստիկանության գլխավոր վարչության Մարաշի բաժին է դիմել Երևանի բնակիչ 62-ամյա Լևոն Մ․-ն և հայտնել, որ մարտի 2-ին «ՀայԷկոնոմ» բանկի Իսահակյան փողոց 12 հասցեում գտնվող մասնաճյուղում Կոտայքի մարզի բնակիչ 18-ամյա Արտաշես Ա․-ն ձևակերպել է ոսկու գրավով վարկ, հաղորդում է Shamshyan.com–ը։

Լևոն Մ․-ն ոստիկաններին հայտնել է, որ բանկի համապատասխան աշխատակիցների կողմից կատարվել են լրացուցիչ ստուգումներ և պարզվել է, որ Արտաշես Ա․-ի կողմից գրավադրված ոսկին կեղծ է և պարունակում է այլ մետաղներ։

Նույն օրը ոստիկանության Մարաշի բաժնի ծառայողների կողմից Արտաշես Ա․-ն խարդախություն կատարելու հիմնավոր կասկածանքով ձերբակալվել և տեղափոխվել է ոստիկանության Մարաշի բաժին։

Դեպքի փաստով ոստիկանության Մարաշի բաժնում փաստաթղթեր են կազմվել, որոնք փոխանցվել են ՀՀ Քննչական կոմիտեի Երևան քաղաքի քննչական վարչության Կենտրոն և Նորք Մարաշ վարչական շրջանների քննչական բաժին։

Կայքի տեղեկություններով՝ Լևոն Մ․-ն աշխատում է «ՀայԷկոնոմբանկում՝ որպես անվտանգության մասնագետ։