Վրաստանում լրագրող է ձերբակալվել՝ Կոբախիձեի և Ալիևի ենթադրյալ գաղտնի համաձայնության մասին տեղեկությունների պատճառով

Վրաստանի դատախազությունը «Ասավալ-Դասավալի» թերթի լրագրող Դոմենտի (Դիտո) Չուբինիձեին ձերբակալել է հայրենիքի դավաճանության, մասնավորապես՝ սաբոտաժի մեղադրանքով։ Այս մասին հայտնում է Sova-News-ը։

Դատախազության պնդմամբ՝ 2026 թվականի փետրվարից Չուբինիձեն տարբեր լրատվամիջոցներով և սոցիալական հարթակներով տարածել է տեղեկություններ այն մասին, թե Վրաստանի վարչապետ Իրակլի Կոբախիձեն Ադրբեջանի նախագահ Իլհամ Ալիևի հետ գաղտնի համաձայնության արդյունքում Դավիթ Գարեջիի վանական համալիրի մի մասը հանձնել է Ադրբեջանին։

Վրաստանի դատախազությունը հերքում է այդ պնդումները՝ նշելով, որ համալիրի հատվածում պետական սահմանի որոշման վերաբերյալ Ադրբեջանի հետ համաձայնություն ձեռք չի բերվել։ Գերատեսչության հայտարարության համաձայն՝ գործող իրավական ընթացակարգերը չեն նախատեսում, որ վարչապետը կարող է միանձնյա որոշմամբ տարածք հանձնել մեկ այլ պետության։

Դատախազության պնդմամբ՝ լրագրողը նաև Լազարե Ջորբենաձեի մահը կապել է ենթադրյալ վրեժի շարժառիթով պատվիրված սպանության հետ՝ հայտարարելով, թե վերջինս վարչապետի վերաբերյալ բացահայտող տեղեկություններ էր հրապարակել։

Ջորբենաձեն մահացել է 2026 թվականի ապրիլի 4-ին։ Պաշտոնական վարկածի համաձայն՝ նա ինքնասպանություն է գործել։ Մահից մի քանի շաբաթ առաջ հրապարակված հարցազրույցում նա պնդել էր, թե Կոբախիձեն և Ալիևը գաղտնի համաձայնություն են ձեռք բերել Դավիթ Գարեջիի վանական համալիրի մի մասը Ադրբեջանին հանձնելու վերաբերյալ։ Այդ պնդումները, ըստ հրապարակման, ապացույցներով չէին հիմնավորվել։

Դոմենտի Չուբինիձեն, իր հերթին, կասկածի տակ էր դրել Ջորբենաձեի մահվան պաշտոնական վարկածը։ Գործի առնչությամբ Վրաստանի դատախազությունը հայտարարել է, որ լրագրողի գործողությունները, իր գնահատմամբ, խոչընդոտել են պետական մարմինների և սահմանազատման հարցերով կառավարական հանձնաժողովի բնականոն գործունեությանը։

Չուբինիձեին առաջադրվելիք մեղադրանքը նախատեսում է մինչև չորս տարվա ազատազրկում։ Դատախազությունը մտադիր է դատարանից պահանջել նրա նկատմամբ որպես խափանման միջոց ընտրել կալանքը։