Վրաստանն ու Չինաստանը հայտարարում են «համապարփակ ռազմավարական գործընկերության» նոր փուլի մասին

Վրաստանի և Չինաստանի միջև հարաբերությունները թևակոխում են որակական նոր մակարդակ: Վրաստանի վարչապետ Իրակլի Կոբախիձեն ազդարարել է երկու երկրների միջև համապարփակ ռազմավարական գործընկերության մեկնարկի մասին՝ հավելելով, որ համապատասխան պաշտոնական համաձայնագիրն արդեն ստորագրվել է, հայտնում են վրացական ԶԼՄ-ները:

Կառավարության ղեկավարը հիշեցրել է, որ շուրջ երեք տարի առաջ Թբիլիսին ու Պեկինը ստորագրել էին ռազմավարական գործընկերության հաստատման փաստաթուղթ, որն այս տարիների ընթացքում զգալի արդյունքներ է գրանցել։ Ըստ Կոբախիձեի՝ նոր համաձայնագիրը խորացնելու է ձեռք բերված հաջողությունները ինչպես քաղաքական, այնպես էլ տնտեսական հարթություններում։

Որպես երկկողմ հարաբերությունների սերտացման շոշափելի օրինակներ՝ Վրաստանի վարչապետն առանձնացրել է մի շարք ուղղություններ.

«Այս երեք տարին շատ բան է բերել երկկողմ հարաբերություններին։ Մեր քաղաքական և տնտեսական կապերը շատ են խորացել, ինչը նաև արտահայտվել է կոնկրետ գործողություններով, այդ թվում՝ հաստատվել է առանց վիզայի ճանապարհորդություն, մենք ունենք ուղիղ չվերթներ, այս տարի ավելացվում են նոր չվերթներ, ինչը ապահովում է Վրաստանի և Չինաստանի միջև ավելի մեծ շարժունակություն, և նաև, առևտրի և տնտեսության առումով, մենք ունենք շատ կոնկրետ, շոշափելի արդյունքներ»։

Ակնկալվում է, որ «համապարփակ» կարգավիճակ ստացած այս գործընկերությունը նոր թափ կհաղորդի երկու երկրների միջև տնտեսական շարժունակությանը, ենթակառուցվածքային ծրագրերին և առևտրաշրջանառության ծավալների ընդլայնմանը։