Վրաստանին չհրավիրելը ԵՄ-ի պարադոքսալ որոշումն է. Բոճորիշվիլիի արձագանքը

Վրաստանի արտգործնախարար Մակա Բոճորիշվիլին խորհրդարանում հարց ու պատասխանի ժամանակ անդրադարձել է 2025թ․ հոկտեմբերի 20-ին նախարարական հանդիպմանը Վրաստանին չհրավիրելուն, հայտնում են վրացական ԶԼՄ-ները։ 

«Տիկին Կայա Կալասը չհրավիրեց Վրաստանին 2025թ․ հոկտեմբերի 20-ին կայանալիք կապի հարցերով նախարարական հանդիպմանը, որին հրավիրված էին Կենտրոնական Ասիայի բոլոր հինգ պետությունները, ինչպես նաև Ադրբեջանի, Հայաստանի և Թուրքիայի արտաքին գործերի նախարարները։ Հենց «ժողովրդավարական հետընթացն» էր պատճառը, որ Վրաստանը բացակայում էր այս կազմից, ինչը ծիծաղելի է։ Այս մոտեցումը պարադոքսալ է, երբ մի երկիր, որն այսօր Եվրամիության համար կապի առումով հիմնական երկիրն է, հատկապես, երբ խոսքը Կենտրոնական Ասիայի հետ կապի մասին է, բանակցությունների սեղանի շուրջ չէ»,-հայտարարել է Մակա Բոճորիշվիլին:

Նա պնդել է, որ ընդդիմությունն էլ չպետք է խուսափի պատասխանատվության իր բաժնից, քանի որ ընտրությունների մերժումն ընդիմության կողմից հիմք են տվել «եվրոպական բյուրոկրատիային խոսել այսպես կոչված ժողովրդավարական հետընթացի մասին»։

Մակա Բոճորիշվիլին անդրադարձել է նաև Ռուսաստանի հետ հարաբերությունների հնարավոր կարգավորմանը։