Վրաստանի խորհրդարանում ընդդիմադիր պատգամավորին ծեծի ենթարկելուց հետո քրեական գործ չի հարուցվել․ ԶԼՄ

Վրացական Javakhadze տելեգրամյան ալիքը հրապարակել է «Հանուն Վրաստանի» ընդդիմադիր կուսակցության պատգամավոր Գիգա Պարուլավայի լուսանկարը։ Վերջինս խորհրդարանի նիստի ժամանակ ծեծի էր ենթարկվել «Վրացական երազանք» կուսակցության պատգամավորների կողմից։

Նիստին ներկա են եղել վարչապետ Իրակլի Կոբախիձեն, գլխավոր դատախազը, ներքին գործերի նախարարը և Համայն Վրաստանի կաթողիկոսը։

Լրատվամիջոցը նշում է, որ միջադեպից հետո քրեական գործ չի հարուցվել, ոչ էլ վարչական հետապնդում է սկսվել, հրապարակային ներողություն ևս չի եղել։

«Սա շատ բան է ասում այն մասին, թե ինչպես է այսօր աշխատում օրենքը Վրաստանում։ Ոմանք կարող են հարձակվել լրագրողների ու ընդդիմադիրների վրա, թալանել բյուջեն, հովանավորել խարդախ քոլ-կենտրոնների գործունեությունը և անպատիժ մնալ։ Իսկ մյուսները 5-7 տարվա ազատազրկում են ստանում հանրահավաքներին մասնակցելու համար»,-գրում է ալիքը։