Վազգեն Թևանյանը հաղթանակ տարավ ադրբեջանցի ըմբիշի նկատմամբ

Ալբանիայի մայրաքաղաք Տիրանայում ընթացող ազատ ոճի ըմբշամարտի Եվրոպայի առաջնությունում Հայաստանի հավաքականը ևս մեկ մեդալ նվաճեց այս մասին տեղեկանում ենք  Armsport-ից :

65 կգ քաշայինների պայքարում Վազգեն Թևանյանը բրոնզե մեդալի համար գոտեմարտում ուժերը չափեց Ադրբեջանի ներկայացուցիչ Ռաշիդ Բաբազադեի հետ և 7-0 հաշվով վստահ առավելության հասնելով՝ կանգնեց պատվո հարթակի երրորդ աստիճանին։ 

Մեր մարզիկը մրցաշարը սկսել էր հաղթանակներով:

Վազգեն Թևանյանը որակավորման փուլում 5-2 հաշվով առավելության էր հասել Ֆրանսիան ներկայացնող Խամզատ Արսամերզուևի նկատմամբ, իսկ քառորդ եզրափակիչում 2-1 հաշվով պայքարից դուրս էր թողել բուլղարացի Շամիլ Մամեդովին:

Կիսաեզրափակիչի լարված գոտեմարտում նա 3-3 հաշվով ավարտեց պայքարը Ռուսաստանի ներկայացուցիչ Բաշիր Մագոմեդովի հետ և զիջեց մրցակցին միայն վերջին միավորը տանուլ տալու կանոնի հետևանքով՝ ստանալով բրոնզե մեդալի համար գոտեմարտելու իրավունք: