Վահագն Խաչատուրյանն ընդունել է ՆԱՏՕ-ի հատուկ ներկայացուցչին

Հանրապետության նախագահ Վահագն Խաչատուրյանն ընդունել է Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Քևին Համիլթոնին, այս մասին տեղեկացնում է ՀՀ նախագահի մամլո ծառայության պաշտոնական կայքը:

Ողջունելով հյուրին և շնորհավորելով նրան նշանակման կապակցությամբ՝ նախագահը բարձր է գնահատել Հայաստան–ՆԱՏՕ հարաբերությունների զարգացումը։

«Գոհունակությամբ եմ նշում, որ Հայաստանը և ՆԱՏՕ-ն իսկապես կարողացել են ստեղծել ամուր հիմք ավելի ամուր գործընկերության համար։ Մենք պահպանում ենք բավականին ակտիվ երկխոսություն և համագործակցություն ՆԱՏՕ-ի և դաշնակից երկրների հետ, և հուսով եմ, որ Ձեր պաշտոնավարման ընթացքում մենք առավել կընդլայնենք համատեղ նախաձեռնություններն ու ծրագրերը»,- նշել է Հանրապետության նախագահը։

Քևին Համիլթոնը, շնորհակալություն հայտնելով ընդունելության համար, ընդգծել է համագործակցության խորացման կարևորությունը։

«Առավել ջանքեր եմ գործադրելու Հայաստան–ՆԱՏՕ համագործակցության զարգացման, ինչպես նաև տարածաշրջանում կայունության և անվտանգության ամրապնդման ուղղությամբ»,- ասել է նա։

Հանդիպման ընթացքում կողմերը քննարկել են տարբեր ձևաչափերում համագործակցության ընդլայնման հնարավորությունները՝ ընդգծելով բարձր մակարդակի քաղաքական երկխոսության դրական ընթացքը։

Քննարկվել են նաև ժողովրդավարության, օրենքի գերակայության և կառավարման թափանցիկության ամրապնդման հարցերը՝ կարևորելով համատեղ ծրագրերի իրականացումը և լավագույն փորձի փոխանակումը։

Նախագահ Խաչատուրյանը նշել է, որ ՆԱՏՕ անդամ երկրների հետ Հայաստանի համագործակցությունը շարունակաբար ընդլայնվում է՝ ընդգրկելով ինչպես քաղաքական, այնպես էլ պաշտպանական և ռազմական ոլորտներ՝ նպաստելով երկրի զարգացմանն ու տարածաշրջանային անվտանգության ամրապնդմանը։

Կողմերը վերահաստատել են պատրաստակամությունը՝ շարունակելու կառուցողական երկխոսությունը և զարգացնելու գործընկերությունը՝ ուղղված տարածաշրջանում խաղաղության և կայունության ապահովմանը։