Տոնակատարություններ Լիբանանում՝ Իսրայելի հետ 10-օրյա հրադադարի մեկնարկի կապակցությամբ

Լիբանանում տեղի են ունեցել ուրախության տեսարաններ․ Բեյրութում կեսգիշերից անմիջապես հետո բնակիչները տոնական կրակոցներ են արձակել օդ՝ նշելով հրադադարի ուժի մեջ մտնելը, այս մասին հայտնում է "Ալ Ջազիրա"–ն։

Տեղահանված ընտանիքները սկսել են վերադառնալ դեպի հարավային Լիբանան և Բեյրութի հարավային արվարձաններ՝ չնայած պաշտոնյաների նախազգուշացումներին՝ չշտապել վերադառնալ իրենց տները, մինչև պարզ չդառնա՝ արդյոք հրադադարը կպահպանվի։

Լիբանանի բանակը հայտարարել է, որ հրադադարի ուժի մեջ մտնելուց անմիջապես հետո Իսրայելը խախտումներ է կատարել՝ ներառյալ հարավային մի քանի գյուղերի պարբերական հրետակոծությունը։ Իսրայելի զինված ուժերը դեռևս չեն մեկնաբանել այս պնդումները։

«Հեզբոլլահ»-ը հրապարակել է ծավալուն հայտարարություն՝ ներկայացնելով Իսրայելի դեմ իր ռազմական գործողությունները ողջ հինգշաբթի օրվա ընթացքում։

Խմբավորումը նշել է, որ իր վերջին հարվածը իրականացրել է տեղական ժամանակով 23:50-ին (20:50 GMT), հրադադարից ընդամենը 10 րոպե առաջ։

ԱՄՆ նախագահ Դոնալդ Թրամփը ավելի ուշ սոցիալական ցանցերում հորդորել է «Հեզբոլլահ»-ին պահպանել հրադադարը։

"Հուսով եմ՝ «Հեզբոլլահ»-ը այս կարևոր ժամանակահատվածում կվարվի բարեկամաբար և ճիշտ կերպով։ Դա նրանց համար կլինի հիանալի պահ, եթե նրանք դա անեն ։ Այլևս սպանություններ չպետք է լինեն։ Վերջապես պետք է լինի խաղաղություն։",– գրել է Թրամփը Truth Social–ի իր հարթակում։