Տները՝ բողոքների պատճառ․ Ալիևի «Մեծ վերադարձը» հերթական անգամ հայտնվում է քննադատության կենտրոնում

Ադրբեջանական սոցիալական ցանցերի սեգմենտում հերթական տեսանյութն է հայտնվել, որտեղ 44-օրյա պատերազմից հետո Ադրբեջանի վերահսկողության տակ անցած տարածքներում բնակվող մի բնակիչ դժգոհություն է հայտնում իրեն հատկացված տան անմխիթար վիճակի վերաբերյալ։ Նախկինում ևս բազմաթիվ բողոքներ են ստացվել տարածաշրջանում տրամադրված այլ բնակարանների մասով։

Այդ տարածաշրջանից նման բողոքներ պարբերաբար հայտնվում են հանրային տիրույթում։ Այս ֆոնին, ըստ դիտարկումների, «Մեծ վերադարձ» ծրագրի իրականացման շուրջ հնչող հայտարարությունները լիարժեք արդյունք դեռևս չեն տալիս, քանի որ բնակարանային և կենցաղային պայմանների վերաբերյալ դժգոհությունները շարունակում են մնալ, ինչը որոշակի հարցեր է առաջացնում ծրագրի արդյունավետության շուրջ և «տեղահանված» ադրբեջանցիները չեն ցանկանում վերադառնալ Ղարաբաղ մշտական բնակության։

Ըստ ադրբեջանական որոշ ընդդիմադիր լրատվամիջոցների՝ Ղարաբաղում տների կառուցման պետական ծրագրում ներգրավված է Իլհամ Ալիևի նախկին փեսա, միլիարդատեր Էմին Ագալարովի հետ փոխկապակցված ընկերություն։ Լրատվամիջոցները պարբերաբար անդրադառնում են այս թեմային և նշում հնարավոր կոռուպցիոն ռիսկերի մասին։