Tasnim. Հայաստանը ձևավորել է ԱԹՍ-ների առանձին զորատեսակ և ռազմարդյունաբերության մեջ ներդրել 450 մլն դոլար

Իրանական «Tasnim» (ԻՀՊ–ին փոխկապակցված ԶԼՄ) լրատվական գործակալությունն անդրադարձել է Հայաստանի ռազմական անօդաչու ավիացիայի զարգացմանը՝ արձանագրելով ոլորտում գրանցված կտրուկ փոփոխությունները։

Հոդվածում նշվում է, որ եթե 2020 թվականի 44-օրյա պատերազմի ժամանակ Երևանը չուներ ԱԹՍ-ների արդյունավետ ուժ և ծանր կորուստներ կրեց իսրայելական ու թուրքական անօդաչուների պատճառով, ապա 2026 թվականին պատկերն արմատապես փոխվել է։

Լրատվամիջոցի փոխանցմամբ՝ վերջին տարիներին բյուրոկրատիայի կրճատումը և պետության կողմից տեղական ռազմարդյունաբերության մեջ կատարված շուրջ 450 միլիոն դոլարի ներդրումները հանգեցրել են բանակում «ԱԹՍ ուժերի»՝ որպես առանձին զորատեսակի ձևավորմանը։

Իրանական գործակալությունն ընդգծել է նաև, որ մայիսի 28-ի զինվորական շքերթի ժամանակ ի ցույց են դրվել ինչպես հայրենական արտադրության ԱԹՍ-ները, այնպես էլ արտերկրից ձեռք բերված ռազմական գնումները։