Թուրքիայում ջրհեղեղների հետևանքով տուժել է 12 մարդ

Թուրքիայի հյուսիսում՝ Սամսուն նահանգի Հավզա շրջանում, ուժեղ անձրևների հետևանքով առաջացած ջրհեղեղների պատճառով մեկ օրով դադարեցվել են դպրոցական դասերը, այս մասին հայտնում են թուրքական լրատվամիջոցները։

Հորդառատ տեղումները հանգեցրել են գետերի վարարումների և մի շարք բնակավայրերի ջրածածկման։ Մի քանի դպրոցներում գրանցվել են վնասներ և մաքրման ու վերականգնման աշխատանքների անհրաժեշտություն, ինչի պատճառով որոշվել է ժամանակավորապես դադարեցնել ուսումնական գործընթացը։

Իշխանությունների տվյալներով՝ ջրհեղեղի հետևանքով 12 մարդ ստացել է թեթև վնասվածքներ։ Բոլորը տեղափոխվել են հիվանդանոցներ․ տուժածներից մեկը՝ 83-ամյա տղամարդը, գտնվում է բժիշկների հսկողության տակ, մյուսները բուժում են ստանում ամբուլատոր պայմաններում։

Նշվում է, որ ուժեղ անձրևների պատճառով կտրուկ բարձրացել է Հաջի Օսման և Տերսական գետերի ջրի մակարդակը։ Ջրածածկվել են շենքերի նկուղներն ու առաջին հարկերը, ինչպես նաև արձանագրվել են դեպքեր, երբ ջրի հոսքը քշել է ավտոմեքենաներ։