Թուրքիայի փոխնախագահ․ Հայոց ցեղասպանության ճանաչման նախաձեռնությունը սադրանք է հայ-ադրբեջանական խաղաղության գործընթացի դեմ

Թուրքիայի փոխնախագահ Ջևդեթ Յըլմազը մասնակցել է Թուրքիայի մամուլի ասոցիացիայի կազմակերպած «Անատոլիական զրույցներ» ծրագրին, որտեղ պատասխանել է լրագրողների հարցերին, հայտնում է Anadolu-ն։

Յըլմազն անդրադարձել է Իսրայելի արտգործնախարար Գիդեոն Սաարի հայտարարությանը, ըստ որի վերջինս պատրաստվում է կառավարության քննարկմանը ներկայացնել Հայոց ցեղասպանությունը պաշտոնապես ճանաչելու առաջարկ։

«Մենք որևէ կերպ չենք կարող ընդունել այս մոտեցումը։ Ակնհայտ է, թե ինչու է Իսրայելը դիմում նման նախաձեռնությունների։ Դրանք իրենց իսկ իրականացրած ցեղասպանությունն ու սեփական հանցագործությունները քողարկելու փորձեր են։ Ինչ էլ անեն, Գազայում տեղի ունեցածը կատարվել է ողջ մարդկության աչքի առաջ։ Այն արդեն դարձել է պատմության մաս, արձանագրված է և երբեք չի մոռացվելու։ Գազայում տեղի ունեցածը երբեք չի մոռացվելու։ Դրա հետևանքները մարդկության խղճի վրա կշարունակեն արտացոլվել ինչպես կարճաժամկետ, այնպես էլ երկարաժամկետ հեռանկարում։ Միևնույն ժամանակ, սա կարելի է գնահատել նաև որպես սադրանք՝ ուղղված Ադրբեջանի և Հայաստանի միջև խաղաղության գործընթացի, ինչպես նաև Թուրքիայի և Հայաստանի միջև հարաբերությունների կարգավորման դեմ», – հայտարարել է Թուրքիայի փոխնախագահը։