Ստեփանակերտում «Տատիկ-պապիկ» հուշարձանը քանդելու լուրն այս պահին չի հաստատվում. Պաշտոնական հայտարարություն

Ինչպես նշվում է հայտարարության մեջ, համացանցում տարածվող լուսանկարի իսկությունը, դրա ստեղծման ժամանակը, վայրը, ինչպես նաև ներկայացված իրադարձության համապատասխանությունը իրականությանը ներկայումս գտնվում են ստուգման փուլում։ Ուսումնասիրությունն իրականացվում է բազմակողմանի փաստերի, այդ թվում՝ արբանյակային պատկերների և այլ հավաստի աղբյուրների հիման վրա։

Կառույցները հորդորում են քաղաքացիներին, զանգվածային լրատվության միջոցներին, հասարակական կազմակերպություններին և սոցցանցերի օգտատերերին զերծ մնալ չստուգված տեղեկությունների տարածումից և սպասել պաշտոնական հաստատմանը։

«Նման բնույթի հրապարակումները, հատկապես երբ վերաբերում են ազգային ինքնության և մշակութային ժառանգության առանցքային խորհրդանիշներին, կարող են լուրջ հոգեբանական ազդեցություն ունենալ բռնի տեղահանված արցախահայության և ողջ հայ հասարակության վրա՝ խորացնելով անհանգստությունը, ցավն ու տեղեկատվական անորոշությունը»,- ասված է հայտարարության մեջ։

Մասնագետներն ընդգծում են, որ նմանատիպ աղմկահարույց հրապարակումները կարող են անհարկի ուշադրություն հրավիրել տվյալ մշակութային արժեքի վրա և որոշ դեպքերում նպաստել դրա նկատմամբ հետագա վանդալիզմի կամ ոչնչացման ռիսկերի մեծացմանը։ Ցավով արձանագրվում է նաև, որ վերջին շրջանում նման զգայուն թեմաները հաճախ օգտագործվում են դիտումների և հանրային արձագանքի արհեստական աճ ապահովելու նպատակով։

Արցախի մշակութային ժառանգության օմբուդսմենի գրասենյակը խոստանում է ստուգման ավարտից հետո կամ նոր հաստատված տվյալների առկայության դեպքում հանրությանը տեղեկացնել պաշտոնական հայտարարությամբ։ Հաշվի առնելով հանրության վրա հնարավոր հոգեբանական բացասական ազդեցությունը՝ կառույցները ձեռնպահ են մնացել այդ լուսանկարը հրապարակելուց։