Սխալվելու իրավունք այլևս չկա․ Մխիթարյանը վերադառնում է ամենավճռորոշ պահին

Միլանի «Ինտերի» հայ կիսապաշտպան Հենրիխ Մխիթարյանը, ամենայն հավանականությամբ, կընդգրկվի թիմի հայտացուցակում Իտալիայի Ա սերիայի առաջիկա՝ «Ռոմայի» դեմ խաղում այս մասին հայտնում է armposrt.am կայքը։

Ըստ իտալական աղբյուրների՝ 37-ամյա ֆուտբոլիստը սպասվածից արագ է ապաքինվում ազդրի վնասվածքից, որը ստացել էր նախորդ ամիս «Ատալանտայի» դեմ հանդիպման ժամանակ։ Վնասվածքի պատճառով Մխիթարյանը բաց էր թողել նաև «Ֆիորենտինայի» դեմ վերջին խաղը, որտեղ «Ինտերը» միավորներ կորցրեց։

Չնայած դրան՝ միլանյան ակումբը շարունակում է գլխավորել մրցաշարային աղյուսակը՝ 6 միավորով առաջ անցնելով «Միլանից», սակայն առաջնության ավարտին մնացած 8 տուրում թիմն այլևս սխալվելու իրավունք չունի՝ հաշվի առնելով, որ երեք խաղ անընդմեջ չի հաղթել։

Թիմի ճամբարից կան նաև դրական նորություններ․ հարձակվող Լաուտարո Մարտինեսը վերադարձել է լիարժեք մարզումներին և, ամենայն հավանականությամբ, կմեկնարկի «Ռոմայի» դեմ խաղում։

Ինչ վերաբերում է Մխիթարյանին, սպասվում է, որ նա հանդիպումը կսկսի պահեստայինների նստարանից։