Շալվա Պապուաշվիլի. «Հարավային Կովկասի երկրները եզակի իմաստնություն են դրսևորում հանուն խաղաղության»

Վրաստանի խորհրդարանի նախագահ Շալվա Պապուաշվիլին Միջերկրածովյան խորհրդարանական վեհաժողովի անդամ երկրների խորհրդարանների նախագահների գագաթնաժողովի շրջանակում հանդես է եկել ելույթով, որտեղ առանցքային տեղ են զբաղեցրել տարածաշրջանային անվտանգության և կայունության հարցերը, հայտնում են վրացական ԶԼՄ-ները:

Իր ելույթում Պապուաշվիլին բարձր է գնահատել Հարավային Կովկասի պետությունների դիվանագիտական ջանքերը՝ նշելով, որ ներկայիս բարդ ու անհանգիստ ժամանակաշրջանում Վրաստանը, Հայաստանը և Ադրբեջանը դրսևորում են եզակի իմաստնություն և հեռատեսություն:

«Մեր տարածաշրջանի երկրները ապագայի հստակ տեսլականով հույս են ներշնչում, որ հնարավոր է հասնել տևական խաղաղության, սերտ համագործակցության և կայուն զարգացման», — ընդգծել է Վրաստանի օրենսդիր մարմնի ղեկավարը:

Պապուաշվիլին նաև շեշտել է, որ տարածաշրջանային խաղաղությունը ոչ միայն տեղական նշանակություն ունի, այլև կարևոր նախապայման է միջազգային անվտանգության համակարգի և տրանսպորտային-լոգիստիկ նոր նախագծերի հաջող իրականացման համար: