Պուտինը կարևորել է միասնական մոտեցումների պահպանումը՝ ՀԱՊԿ-ի առջև ծառացած խնդիրների արդյունավետ լուծման համար

Ռուսաստանի նախագահ Վլադիմիր Պուտինը ՀԱՊԿ Անվտանգության խորհուրդների քարտուղարների կոմիտեի նիստին ուղղված ուղերձում ընդգծել է կազմակերպության անդամների միջև գործողությունների սերտ համակարգման և միասնական մոտեցումների կարևորությունը, այս մասին հայտնում է ռուսական «Վեստի»–ն։

Նրա խոսքով՝ ներկայիս աշխարհաքաղաքական իրավիճակը շարունակում է մնալ անկայուն, ինչի պայմաններում անհրաժեշտ է ուժեղացնել համագործակցությունը և ընդլայնել ՀԱՊԿ-ի վերլուծական կարողությունները՝ ռազմավարական որոշումների արդյունավետության բարձրացման համար։

Պուտինը նշել է նաև ՀԱՊԿ մարմինների որոշումների արագ ընդունման և թարմացման անհրաժեշտությունը՝ հաշվի առնելով հնարավոր սպառնալիքները, մասնավորապես՝ ռազմական, տեղեկատվական և կենսաբանական անվտանգության, հակաահաբեկչության, ծայրահեղականության և անօրինական միգրացիայի ոլորտներում։

Նա կարևորել է նաև ճգնաժամային իրավիճակներին արձագանքման համակարգի կատարելագործումը, ինչպես նաև ՀԱՊԿ հավաքական ուժերի կառավարման և գիտատեխնիկական համագործակցության զարգացումը։

Պուտինի խոսքով՝ հանդիպումը անցկացվում է Ռուսաստանի նախագահության տարվա ընթացքում՝ «Հավաքական անվտանգություն բազմաբևեռ աշխարհում․ միասնական նպատակ, ընդհանուր պատասխանատվություն» կարգախոսի ներքո և ուղղված է գործընկերային կապերի ամրապնդմանը։