ՊՆ ռազմական ոստիկանությունը պարզաբանում է օդանավակայանում իրականացվող ծառայության նպատակը

ՀՀ պաշտպանության նախարարության ռազմական ոստիկանությունը, ի պատասխան զանգվածային լրատվամիջոցների հարցումների, հանդես է եկել պարզաբանմամբ՝ կապված սահմանային անցակետերում իրականացվող գործողությունների հետ։

Գերատեսչությունից հայտնում են, որ ռազմական ոստիկանությունը ծառայություն է իրականացնում «Ռազմական ոստիկանության մասին» ՀՀ օրենքով վերապահված լիազորությունների շրջանակում՝ իր առջև դրված խնդիրների կատարումն ապահովելու նպատակով։

Ըստ պաշտոնական հաղորդագրության՝ սահմանային անցակետերում, այդ թվում՝ օդանավակայանում, իրականացվող ծառայության հիմնական նպատակն է աջակցել զինվորական կոմիսարիատներին։ Այդ աջակցությունն ուղղված է զինապարտ քաղաքացիներին զինվորական հաշվառման վերցնելու, պարտադիր զինվորական ծառայության զորակոչելու, ինչպես նաև պահեստազորային պատրաստության միջոցառումներին ներգրավելու գործընթացների պատշաճ կազմակերպմանը։