Պատմական իրադարձություն․ Հայաստանն ու Վրաստանը կհյուրընկալեն ՖԻՖԱ երիտասարդական Աշխարհի առաջնությանը

Քիչ առաջ Կանադայի Վանկուվեր քաղաքում կայացել է ՖԻՖԱ-ի Գործկոմի նիստը, որի ընթացքում հաղթող է ճանաչվել Հայաստանի ու Վրաստանի՝ մրցաշարը հյուրընկալելու համատեղ հայտը, այս մասին հայտնում է Հայաստանի ֆուտբոլի ֆեդերացիան։

Հայաստանն ու Վրաստանը համատեղ կհյուրընկալեն Աշխարի 2029 թվականի երիտասարդական առաջնությունը։

Հայկական ֆուտբոլի համար սա աննախադեպ իրադարձություն է։ Հայաստանը կհյուրընկալի համաշխարհային մակարդակի խոշորագույն ֆուտբոլային մրցաշար, ինչը վկայում է միջազգային հանրության մեծ վստահության մասին:

Հայ երկրպագուներն ու հայկական ֆուտբոլի սիրահարները, և իհարկե  պատանի ֆուտբոլիստները,  հնարավորություն կունենան սեփական հարկի տակ զգալ Աշխարհի առաջնության շունչը։

«Սա մեր բոլորի հաղթանակն է։ Բարի գալուստ Աշխարհի առաջնություն, բարի գալուստ Հայաստան և Վրաստան։ Պատրաստվենք միասին ընդունելու աշխարհի ուժեղագույն երիտասարդական թիմերին»,– ասվում է հաղորդագրությունում։