Ուրալում ադրբեջանական սփյուռքի նախկին ղեկավար Շիխլինսկուն դատապարտել են 24 տարվա ազատազրկման

Ուրալում ադրբեջանական սփյուռքի նախկին ղեկավար Շահին Շիխլինսկուն դատապարտել են  9 տարվա խիստ ռեժիմի ազատազրկման, իսկ նրա որդուն՝ Մութվալի Շիխլինսկուն՝ 8 տարվա ընդհանուր ռեժիմի ազատազրկման՝ իշխանության ներկայացուցչի նկատմամբ բռնություն կիրառելու գործով, հայտնում է «Коммерсант»-ը Եկատերինբուրգի Կիրովսկի շրջանային դատարանից։

Մարտի սկզբին Շահին Շիխլինսկուն արդեն դատապարտել էին 22 տարվա խիստ ռեժիմի ազատազրկմանը՝ 2001 և 2011 թվականներին կատարված սպանության և սպանության փորձի մեղադրանքով։ Դատավճիռների համակցությամբ նրան նշանակվել է 24 տարվա ազատազրկում։ Առաջին 4 տարին նա կանցկացնի բանտում, մնացածը՝ խիստ ռեժիմի գաղութում։

Մեղադրանքի վարկածով՝ 2025 թվականի հուլիսի սկզբին «Բաքու Պլազա» առևտրի կենտրոնի մոտ ուժայինները իրականացրել են գործողություն՝ այն ժամանակ ադրբեջանական սփյուռքի ղեկավար Շահին Շիխլինսկուն ձերբակալելու համար։ Նա գտնվել է ավտոմեքենայում, որը վարում էր նրա որդին՝ Մութվալի Շիխլինսկին։

Երբ հատուկջոկատայինները սկսել են մեքենայից դուրս բերել համայնքի ղեկավարին, վարորդը կտրուկ հետընթաց է կատարել, ինչի հետևանքով Հատուկ  նշանակության ջոկատի  աշխատակիցներից մեկն ընկել է։