Նիկոլ Փաշինյանի գլխավորությամբ քննարկվել է Ոստիկանության բարեփոխումների ընթացքը. հանցագործությունների թիվը նվազել է 3,2%-ով

Վարչապետ Նիկոլ Փաշինյանի գլխավորությամբ Կառավարությունում տեղի է ունեցել Ոստիկանության բարեփոխումները համակարգող խորհրդի նիստը: Օրակարգի շրջանակում քննարկվել է Ոստիկանության բարեփոխումների 2024-2026 թվականների ռազմավարական ծրագրի իրականացման առաջընթացը:

Հիմնական զեկուցող, Ներքին գործերի նախարար Արփինե Սարգսյանը ներկայացրել է 2025 թվականի ընթացքում կատարված միջոցառումների արդյունքները, ինչպես նաև 2026 թվականի անցած ամիսներին կյանքի կոչված բարեփոխումները։

նախարարի ներկայացմամբ՝ ռազմավարական ծրագրի գերակայությունների և ՆԳՆ նոր կառավարման մոդելի շնորհիվ արձանագրվել են մի շարք առանցքային նվաճումներ.

• Ստեղծվել են ՆԳՆ մեկ միասնական կրթահամալիրը, ՆԳՆ 112 օպերատիվ կառավարման կենտրոնը, Ոստիկանական 4 հենասյուները, ինչպես նաև ՆԳՆ հանցավորության վիճակագրության և հետազոտական կենտրոնը։

• Մարդկային ռեսուրսների կառավարման և բարեվարքության ամրապնդման շրջանակում ծառայություններում աշխատանքի անցնելու համար պարտադիր մուտքային պահանջ է սահմանվել բազային կրթությունը: Կատարելագործվել է ատեստավորման համակարգը և ներդրվել կատարողականի գնահատման նոր մոդել։

•  Աշխատանքներ են իրականացվել ոստիկանության գվարդիայի գործարկման, պարեկային ծառայության ու քրեական ոստիկանության զարգացման ուղղությամբ։ Հանրային ծառայությունները զտվել և տեղափոխվել են ՆԳՆ տիրույթ:

Որպես իրականացված հետևողական աշխատանքի արդյունք՝ Արփինե Սարգսյանը նշել է, որ նախորդ տարվա համեմատ հանրապետությունում գրանցվել է հանցագործությունների թվի նվազում՝ 3,2 տոկոսով։

Նիստի ընթացքում խորհրդի անդամները հանդես են եկել դիտարկումներով և առաջարկներով, որոնք ուղղված են եղել քննչական գործառույթների արդյունավետության բարձրացմանը և համայնքային ոստիկանության աշխատանքի բարելավմանը։

Ամփոփելով նիստը՝ վարչապետ Նիկոլ Փաշինյանը կարևորել է բարեփոխումների դինամիկայի պահպանումը և նոր մոտեցումների ներդրումը ռազմավարական նպատակներին հասնելու համար։

Կառավարության ղեկավարը հանձնարարել է ի մի բերել նիստի ընթացքում բարձրացված հարցերը, իրականացնել խորքային վերլուծություններ և հաջորդ հանդիպմանը ներկայացնել հստակ առաջարկություններ հնչեցված խնդիրների լուծման վերաբերյալ։