Մշակույթի և սպորտի ոլորտի պետական ֆինանսավորումը շարունակական աճել է գրանցվել վերջին 8 տարիներին

Մշակույթի ոլորտում 2018 թվականի համեմատ պետական ֆինանսավորման նկատելի աճ է գրանցվել՝ 12.5 միլիարդ դրամից 2025 թվականին հասնելով 19.7 միլիարդ դրամի։

Այս մասին հայտնել է ԿԳՄՍ նախարար Ժաննա Անդրեասյանը ԱԺ մշտական հանձնաժողովների համատեղ նիստում 2025 թ. պետական բյուջեի կատարողականի նախնական քննարկման ընթացքում։

Նրա խոսքով՝ 2026 թվականին ոլորտում նախատեսված է 23.4 միլիարդ դրամ, ինչը 19 տոկոսով ավելի է նախորդ տարվա նկատմամբ:

Գերատեսչության ղեկավարն ընդգծել է, որ եթե 2018 թվականին սպորտի ֆինանսավորումը եղել է 2.3 միլիարդ դրամ, ապա 2025 թվականին այն կազմել է 8.4 միլիարդ դրամ՝ աճելով շուրջ 3.7 անգամ։ 2026 թվականի բյուջեով նախատեսվել է արդեն 13.4 միլիարդ դրամ, ինչը 2025 թվականի համեմատ շուրջ 60 տոկոսով ավելի է։

Նա հատկապես կարևորել է, որ աճել է ոչ միայն բարձր նվաճումների սպորտի, այլև մասսայական սպորտի ֆինանսավորումը։ Մասսայական սպորտի ծախսերը 2018 թվականի համեմատ աճել են շուրջ 5.7 անգամ։

«Այս ուղղությամբ իրականացվող ծախսերը նպատակ ունեն նպաստելու առողջ ապրելակերպի տարածմանը և քաղաքացիների համար սպորտով զբաղվելու հնարավորությունների ընդլայնմանը, այդ թվում՝ սպորտային ենթակառուցվածքների զարգացման, կառուցման և վերակառուցման միջոցով»,- ասել է Անդրեասյանը։