Մի խումբ անձինք 29 դրվագ գործողությամբ իրացրել են կեղծ թղթադրամներ. քրեական վարույթի նախաքննությունն ավարտվել է

ՀՀ քննչական կոմիտեն հայտնում է, որ ավարտվել է կեղծ թղթադրամների իրացման դեպքով հարուցված քրեական վարույթի նախաքննությունը, որը քննվել է հատկապես կարևոր գործերի քննության գլխավոր վարչությունում։

Քննությամբ պարզվել է, որ Մ.Հ.-ն, համագործակցելով իր ծանոթներ Ռ.Ա.-ի, Է.Խ.-ի և Ն.Կ.-ի հետ, 2025 թվականի մայիսից մինչև դեկտեմբեր ընկած ժամանակահատվածում տարբեր անձանց իրացրել է կեղծ թղթադրամներ։ Խմբի անդամները շրջանառության մեջ են դրել տարբեր արժողությամբ կեղծ դրամներ՝ այդ թվում՝ 100.000, 50.000, 20.000 և 10.000 դրամանոց թղթադրամներ։

Արդյունքում, խարդախության միջոցով հափշտակվել է ընդհանուր 1 մլն 149 հազար 860 դրամի գույք։

Նշված անձանց նկատմամբ հարուցվել է հանրային քրեական հետապնդում՝ կեղծ արժույթ իրացնելու և խարդախություն կատարելու 29 դրվագով։

Քննչական մարմնի որոշմամբ՝ Մ.Հ.-ի և Ռ.Ա.-ի նկատմամբ որպես խափանման միջոց ընտրվել է տնային կալանքը, իսկ Է.Խ.-ի և Ն.Կ.-ի նկատմամբ՝ վարչական հսկողությունը։

Քրեական վարույթը մեղադրական եզրակացությամբ ուղարկվել է հսկող դատախազին։


Ծանուցում. հանցագործության համար մեղադրվողը համարվում է անմեղ, քանի դեռ նրա մեղավորությունն ապացուցված չէ Քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։