Մենք պահուստների ռեկորդային բարձր մակարդակ ունենք այս տարի. Արմեն Նուրբեկյան

Հայաստանի Հանրապետության միջազգային պահուստներն այս տարի արձանագրել են ռեկորդային բարձր ցուցանիշ՝ անցնելով 5,6 միլիարդ դոլարի սահմանագիծը։ Ազգային ժողովում Կենտրոնական բանկի գործունեության վերաբերյալ տարեկան հաղորդման ներկայացման ժամանակ այս մասին հայտարարել է ԿԲ նախագահի տեղակալ Արմեն Նուրբեկյանը։

«Մենք պահուստների ռեկորդային բարձր մակարդակ ունենք այս տարի: Արդեն մոտավորապես 5,6 միլիարդից ավելի է, և միայն այս տարի մոտավորապես արդեն 1,1 միլիարդ դոլարի արտարժութային պահուստ ենք գնել»,- նշել է ԿԲ փոխնախագահը։

Արմեն Նուրբեկյանն անդրադարձել է նաև գործադիր իշխանության հետ փոխգործակցությանն ու ԿԲ-ի հիմնական գործառույթներին՝ ընդգծելով, որ կառույցի առանցքային առաքելությունը տնտեսական կայուն միջավայրի երաշխավորումն է։

Նրա խոսքով՝ ամենալավ աջակցությունը, որ Կենտրոնական բանկը կարող է ցուցաբերել Կառավարությանը, մակրոտնտեսական և գների կայունության ապահովումն է։ Սա իր հերթին հիմք է ստեղծում վարկային ու ֆինանսական շուկաներում տոկոսադրույքների կանխատեսելի մակարդակ ձևավորելու համար, ինչի ուղղությամբ էլ այժմ գլխավոր դրամատունը հետևողական աշխատանք է տանում։