Մեկնարկում է ուսուցիչների կամավոր ատեստավորման հայտերի ընդունումը

ՀՀ կրթության, գիտության, մշակույթի և սպորտի նախարարությունը (ԿԳՄՍՆ) հայտարարում է հանրակրթական ուսումնական հաստատությունների ուսուցիչների կամավոր ատեստավորման հայտերի ընդունում, որը կշարունակվի մինչև 2026 թվականի սեպտեմբերի 30-ը:

Գործընթացն իրականացվում է ՀՀ Կառավարության 2022 թ․ ապրիլի 28-ի N 596-Ն որոշման համաձայն։ Անկախ դասավանդվող առարկաների քանակից՝ յուրաքանչյուր ուսուցիչ կարող է հայտ ներկայացնել միայն մեկ առարկայից՝ իր ընտրությամբ։

Կամավոր ատեստավորմանը մասնակցելու իրավունք ունեն․

• Դպրոցներում դասավանդող ուսուցիչները (այդ թվում՝ մինչև 3 տարեկան երեխայի խնամքի արձակուրդում գտնվողները),

• Չաշխատող, սակայն համապատասխան մասնագիտական կամ հարակից բարձրագույն կրթություն ունեցող անձինք,

• Նախնական (արհեստագործական) և միջին մասնագիտական հաստատությունների հանրակրթական առարկաներ դասավանդողները,

• Օրենքի պահանջով մասնագիտական գործունեությունը դադարեցրած բարձրագույն կրթություն չունեցող մանկավարժները (համապատասխան փաստաթղթերի ներբեռնմամբ)։

Հայտերն ընդունվում են էլեկտրոնային եղանակով՝ my.emis.am համակարգի միջոցով։

• Գործող ուսուցիչները մուտք են գործում էլեկտրոնային մատյանի իրենց տվյալներով (մոռանալու դեպքում կարող են դիմել դպրոցի Օպերատորին)։

• Առաջին անգամ դիմողները պետք է գրանցվեն համակարգում՝ օգտվելով support.emis.am կայքում հասանելի ուղեցույց N 945 և ուղեցույց N 956 հղումներից։

Անհրաժեշտ է հիշել․ Սահմանված ժամկետից (սեպտեմբերի 30) հետո ներկայացված հայտերը չեն դիտարկվի:

Ատեստավորումն իրականացվում է էլեկտրոնային թեստավորման եղանակով (բացառությամբ ասորերենի, եզդիերենի և քրդերենի, որոնց թեստավորումը կլինի թղթային)։

• 1-4-րդ դասարանների դասվարները քննություն են հանձնում մեկ միասնական թեստով («Մայրենի», «Մաթեմատիկա», «Ես և շրջակա աշխարհը»)։ Թեստը կազմվում է հայերենով, իսկ ռուսերենով ուսուցմամբ դասարանների համար՝ ըստ ցանկության, ռուսերենով։

• 5-12-րդ դասարանների ուսուցիչների համար որոշ առարկաներ միավորված են․

  • «Մայրենի», «Հայոց լեզու», «Գրականություն» — ատեստավորում միայն «Հայոց լեզու» առարկայից,

  • «Հայաստանի պատմություն» և «Համաշխարհային պատմություն» — «Պատմություն» առարկայից,

  • «Հանրահաշիվ» և «Երկրաչափություն» — կներառվեն մեկ միասնական թեստում,

  • «Աշխարհագրություն» — ընդհանուր «Աշխարհագրություն» առարկայից,

  • «Բնագիտություն», «Իմ հայրենիքը» և նմանատիպ ինտեգրված առարկաների ուսուցիչներն ընտրում են իրենց որակավորմանը համապատասխան հիմնական առարկան։