Կրակոցներ Կիևում․ վեց զոհ, հարձակվողը սպանվել է, պատանդները ազատ են արձակվել

Շաբաթ օրը Կիևում անհայտ անձը կրակ է բացել մարդկանց վրա Գոլոսեևսկի շրջանում։ Զոհվել է վեց մարդ։ Հարձակվողը սպանվել է ձերբակալման ընթացքում․ իրավապահները գրոհել են սուպերմարկետը, որտեղ նա բարիկադավորվել էր, այս մասին հայտնում է BBC-ն:

Ավելի վաղ իշխանությունները հայտնել էին հինգ զոհի մասին։ Այնուհետև ևս մեկ կին մահացել է հիվանդանոցում՝ ստացած վնասվածքներից։

Տուժածների թիվը նույնպես աճել է լուրի հրապարակումից հետո։ Այժմ հաղորդվում է, որ 14 մարդ հոսպիտալացվել է տարբեր վնասվածքներով։ Իշխանությունները նշել են, որ բոլորին ցուցաբերվում է անհրաժեշտ օգնություն։ Հաջողվել է փրկել չորս պատանդի։

Ուկրաինայի անվտանգության ծառայությունը  հայտնել է, որ հետաքննում է միջադեպը որպես «ահաբեկչական գործողություն»։

«Գոլոսեևսկի շրջանում փողոցում վիրավորների թվում կա նաև երեխա։ Բժիշկները նրան տեղափոխում են հիվանդանոց։ Մեծահասակ տուժածներին զննում են և օգնություն ցուցաբերում», — սոցիալական ցանցերում գրել է Կիևի քաղաքապետ Վիտալի Կլիչկոն։

«Ազգային ոստիկանության  հատուկ ստորաբաժանումները իրականացրել են խանութի գրոհը, որտեղ գտնվել է հանցագործը։ Նա պատանդներ էր վերցրել և ձերբակալման ընթացքում կրակ էր բացել ոստիկանների վրա։ Մինչ այդ բանակցողները փորձել էին նրա հետ կապ հաստատել», — հայտնել են ոստիկանությունից։

Հաղորդվում է, որ տղամարդը նախ կրակել է անցորդների վրա փողոցում, ապա պատանդներ է վերցրել Կիևի Գոլոսեևսկի շրջանի սուպերմարկետում։

Ուկրաինայի գլխավոր դատախազ Ռուսլան Կրավչենկոն նշել է, որ հրաձիգը 58-ամյա, Մոսկվայում ծնված տղամարդ է։