Կիևում ռուսական ԱԹՍ-ի հարվածից վնասվել է ռեժիսոր Ռոման Բալայանի բնակարանը. Տիգրան Հակոբյան

Հեռուստատեսության և ռադիոյի հանձնաժողովի նախագահ Տիգրան Հակոբյանն իր ֆեյսբուքյան էջում տեղեկացրել է, որ Կիևի կենտրոնում ռուսական անօդաչու թռչող սարքի հարվածից վնասվել է աշխարհահռչակ հայ ռեժիսոր Ռոման Բալայանի բնակարանը։

ԱԹՍ-ի պայթյունի հետևանքով փլուզվել է բնակարանի պատշգամբը, իսկ խոհանոցն ու ննջարանը դարձել են բնակության համար անպիտան։

Բարեբախտաբար, հարձակման պահին 85-ամյա Ռոման Բալայանը և նրա կինը՝ Նատալյան, տանը չեն եղել և չեն տուժել։

Տիգրան Հակոբյանը հայտնել է, որ հեռախոսազրույց է ունեցել ռեժիսորի հետ, որը, նրա խոսքով, նույնիսկ կատակում էր տեղի ունեցածից հետո։