ԿԳՄՍ նախարարը հանդիպել է հանրակրթական դպրոցների տնօրենների հետ

ՀՀ  կրթության, գիտության, մշակույթի և սպորտի նախարար Ժաննա Անդրեասյանն Աջափնյակ վարչական շրջանի Շառլ Ազնավուրի գրադարանում հանդիպել է հանրակրթական մի շարք դպրոցների տնօրենների և վարչատնտեսական համակարգողների հետ։ Այս մասին տեղեկանում ենք ԿԳՄՍ նախարարությունից:

Նախարարը կարևորել է դպրոց–գրադարան համագործակցությունը և ասել է, որ երեխաների շրջանում ընթերցանության խրախուսումը պետք է դիտել առաջնահերթ խնդիր, որովհետև եթե բավարար չափով զարգացած չեն ընթերցանության և տեքստի ընկալման հմտությունները, գիտելիքի զարգացումը սահմանափակվում է:

Կարևորելով գրադարանների զարգացումը  նախարարն ասել է, որ նախատեսվում է դպրոցական բյուջեներում առանձնացնել առանձին տող գրքերի ձեռքբերման համար. «Փաթեթային տրամաբանությամբ նախատեսում ենք նորակառույց դպրոցների համար ձեռք բերել և տրամադրել նոր գրքերի հավաքածուներ։ Դրանք կլինեն դպրոցական ծրագրին և տարիքային առանձնահատկություններին համապատասխան գրքեր։ Միևնույն ժամանակ, նախատեսվում է գրադարանային ֆոնդերի շարունակական թարմացում, ինչը հնարավորություն կտա դպրոցներին ամեն տարի համալրել իրենց գրական պաշարները»:

Հանդիպման ընթացքում քննարկվել են այնպիսի կարևոր թեմաներ, ինչպիսիք են դպրոցներում անվտանգության խնդիրները, լաբորատոր հագեցվածությունը, Երևանի դպրոցներում «Դպրոցական սնունդ» ծրագրի ներդրումը և այլն։

Անդրադառնալով վարչատնտեսական համակարգողի համակարգի ձևավորմանը՝ նախարարը նշել է, որ մի քանի տարի առաջ ներդրված կառավարման նոր մոդելի հիմքում դրված է հետևյալ սկզբունքը՝ մի շարք գործառույթներ՝ գնումներ, հաշվապահություն, անվտանգություն, մաքրություն, սնունդ և այլն, կարող են իրականացվել մասնագիտացված ծառայությունների միջոցով։ Նպատակը, ըստ նախարարի, մեկն է՝ տնօրեններին ազատել վարչական գործառույթների բեռից, որպեսզի նրանք կենտրոնանան կրթության որակի և բովանդակության վրա։

Անդրադարձ կատարելով դպրոցաշինության ծրագրերին, Ժաննա Անդրեասյանը նշել է որ այժմ քննարկվում է 300 դպրոց ծրագրի հաջորդ փուլը, որտեղ կընդգրկվեն նաև քաղաքային բնակավայրերի, այդ թվում՝ մայրաքաղաքի դպրոցներ․ «Երևանը շատ մեծ չափով ներկայացված է լինելու ծրագրում։ Առաջին փուլում հիմնականում կենտրոնացել էինք մարզային բնակավայրերի ուսումնական հաստատությունների վրա, իսկ երկրորդ փուլում մեր ուշադրությունը ոչ պակաս չափով կենտրոնացված է լինելու Երևանի դպրոցների վրա»։