Քննչական կոմիտեն համալրվել է 35 քննիչով

ՀՀ քննչական կոմիտեի նախագահ Արթուր Պողոսյանը հուլիսի 21-ին հանդիպել է նորանշանակ քննիչներին: Հանդիպմանը ներկա են եղել նաև Կոլեգիայի անդամները:

Արթուր Պողոսյանը շնորհավորել է նորանշանակ քննիչներին և հանձնել նրանց ծառայողական վկայականները:

Կոմիտեի ղեկավարն ընդգծել է քննիչների արդարամիտ, կարգապահ և բարեվարք լինելու անհրաժեշտությունը, ինչպես նաև ներկայացրել, թե ինչպիսի հետևողականություն է անհրաժեշտ ցուցաբերել քաղաքացիների հետ շփումներում՝ անկախ բարձրացված հարցերի բովանդակությունից, և ինչպիսի միջանձնային հարաբերություններ պետք է կառուցել անձնակազմի ներսում:

Անդրադառնալով Քննչական կոմիտեում իրականացվող շարունակական կադրային բարեփոխումներին՝ Արթուր Պողոսյանը նշել է, որ վերջին շրջանում զգալիորեն բարձրացել է քննիչի աշխատանքի գրավչությունը, ինչի շնորհիվ համակարգը համալրվում է երիտասարդ, բանիմաց ու բարեվարք կադրերով:

ՔԿ նախագահի խոսքով՝ պատշաճ կադրային համալրվածությունն իր հերթին նպաստել է քրեական վարույթների նախաքննության արդյունավետության և քննիչների արտադրողականության բարձրացմանը: