Քննարկվել է Հյուսիս-հարավի, Դիլիջանի ու Պուշկինի թունելների վերակառուցման ընթացքը. ՀՀ-ն և ԱԶԲ-ն ամփոփել են համատեղ ծրագրերը

ՀՀ տարածքային կառավարման և ենթակառուցվածքների նախարարի տեղակալ Քրիստինե Ղալեչյանի և «Ճանապարհային դեպարտամենտի» ղեկավարության մասնակցությամբ տեղի է ունեցել հանդիպում Ասիական զարգացման բանկի (ԱԶԲ) առաքելության ներկայացուցիչների հետ: Այս մասին հայտնում են «Ճանապարհային դեպարտամենտ» հիմնադրամից։

Օրակարգում են եղել ԱԶԲ-ի աջակցությամբ իրականացվող ճանապարհաշինական խոշոր ծրագրերի ընթացքը, մրցութային գործընթացները, հողերի օտարման աշխատանքները, ինչպես նաև ֆինանսական, իրավական և տեխնիկական հարցերը:

Մասնավորապես, քննարկվել է Հյուսիս-հարավ միջանցքի Սիսիան-Քաջարան 27,1 կմ երկարությամբ հյուսիսային հատվածի կառուցումը, որի համար 2025 թվականին Հայաստանի և ԱԶԲ-ի միջև կնքվել էր 236 միլիոն եվրոյի վարկային համաձայնագիր։

Բացի այդ, անդրադարձ է կատարվել Պուշկինի թունելի վերականգնման, Դիլիջանի նոր թունելի կառուցման և Մ-6 միջպետական ճանապարհի հետաղետային վերականգնման նոր ծրագրերի նախապատրաստական աշխատանքներին:

Նախարարի տեղակալ Քրիստինե Ղալեչյանը բարձր է գնահատել ԱԶԲ-ի հետ ռազմավարական համագործակցությունը՝ վստահություն հայտնելով, որ համատեղ ջանքերով ծրագրերը կիրականացվեն սահմանված ժամկետներում: Հանդիպման ավարտին կողմերը վերահաստատել են սերտ գործակցությունը շարունակելու պատրաստակամությունը: