Ջեյհուն Բայրամովը պաշտոնական այցով կմեկնի Ռուսաստան. ի՞նչ է ներառված օրակարգում

Հուլիսի 16-17-ը Ադրբեջանի արտաքին գործերի նախարար Ջեյհուն Բայրամովը պաշտոնական այցով կմեկնի Ռուսաստանի Դաշնություն։ Այցի շրջանակում նախատեսվում են բանակցություններ ՌԴ արտաքին գործերի նախարար Սերգեյ Լավրովի հետ։ Այս մասին հայտնում է ՌԴ ԱԳՆ–ն։

Կողմերը կքննարկեն երկկողմ համագործակցության ներկա վիճակն ու հեռանկարները, ինչպես նաև մտքեր կփոխանակեն տարածաշրջանային և միջազգային օրակարգի առանցքային հարցերի շուրջ։ Ռուսական կողմն ընդգծում է, որ Ադրբեջանը Ռուսաստանի կարևոր գործընկերն է Հարավային Կովկասում և Կասպից ծովի տարածաշրջանում, և հարաբերությունները զարգանում են դաշնակցային փոխգործակցության ոգով (հիմնված 2022 թ. փետրվարի 22-ի հռչակագրի վրա)։

Մոսկվայի և Բաքվի միջև ներկայումս առկա է ակտիվ քաղաքական, տնտեսական և հումանիտար փոխգործակցություն.

1. Քաղաքական և միջխորհրդարանական երկխոսություն

• Պահպանվում է կանոնավոր երկխոսություն բարձր մակարդակով (վերջին հեռախոսազրույցը ՌԴ և Ադրբեջանի նախագահների միջև տեղի է ունեցել մարտի 11-ին, իսկ կառավարությունների ղեկավարներն այս տարի զրուցել են արդեն երկու անգամ)։

• Ակտիվ են միջխորհրդարանական շփումները (մայիսին Միլլի Մեջլիսի նախագահ Սահիբա Գաֆարովան մասնակցել է Սանկտ Պետերբուրգում ԱՊՀ ՄՎԱ նիստին, իսկ հունիսի 18-ին Բաքվում կայացել է միջխորհրդարանական հանձնաժողովի 24-րդ նիստը)։

2. Տնտեսություն և բիզնես

• Ադրբեջանում գործում է ռուսական կապիտալով ավելի քան 1400 առևտրային կառույց (այդ թվում՝ «ՎՏԲ» բանկը, «Լուկոյլը», «Գերոֆարմը» և այլն)։

• Իրենց հավաքման արտադրություններն ունեն ռուսական ավտոհսկաները՝ «ԿԱՄԱԶ»-ը, «ԳԱԶ»-ը, «Սոլլերս»-ը և «Ավտովազ»-ը։

• Ապրիլի 16-ին Զանգելանում տեղի է ունեցել տնտեսական համագործակցության միջկառավարական հանձնաժողովի 24-րդ նիստը։

3. Կրթություն և հումանիտար ոլորտ

• Ռուսաստանում սովորում է ավելի քան 9 հազար ադրբեջանցի ուսանող (որոնցից ավելի քան 1000-ը՝ պետպատվերով, իսկ տարեկան քվոտան կազմում է շուրջ 280 տեղ)։

• Բաքվում գործում են ՄՊՀ-ի (Լոմոնոսովի անվան) և Սեչենովի անվան բժշկական համալսարանի մասնաճյուղերը։

• Ադրբեջանում գործում է ռուսերենով ուսուցմամբ շուրջ 320 դպրոց։ Օրակարգում է նաև Սանկտ Պետերբուրգի պետական համալսարանի (СПбГУ) բազայի վրա համատեղ ռուս-ադրբեջանական համալսարանի ստեղծումը։

Ռուսաստանի ԱԳՆ-ն իր հայտարարության մեջ անդրադարձել է նաև տարածաշրջանային խնդիրներին՝ կարևորելով մի քանի ուղղություններ.

•  Մոսկվան շեշտում է «3+3» տարածաշրջանային համագործակցության հարթակի (Ռուսաստան, Իրան, Թուրքիա, Ադրբեջան, Հայաստան, իսկ հեռանկարում՝ նաև Վրաստան) զգալի ներուժը՝ տարածաշրջանային խնդիրներն առանց արտաքին «դեստրուկտիվ միջամտության» լուծելու համար։

•  Ռուսական կողմը հայտարարում է իր պատրաստակամության մասին՝ աջակցելու Երևանի և Բաքվի միջև հարաբերությունների ամբողջական կարգավորմանը: Դա ներառում է խաղաղության պայմանագրի կնքումը, սահմանների դելիմիտացիան և տրանսպորտային հաղորդակցությունների ապաշրջափակումը՝ հիմնվելով 2020-2022 թթ. ստորագրված եռակողմ հայտարարությունների վրա։

ՌԴ ԱԳՆ-ն Ջեյհուն Բայրամովի սպասվող այցը դիտարկում է որպես վստահելի քաղաքական երկխոսության շարունակություն և երկկողմ փոխշահավետ գործընկերության ընդլայնման հերթական քայլ։