Իրանի ԱԳ նախարար Աբբաս Արաղչին շնորհակալություն է հայտնել Հայաստանին

Իրանի ԱԳ նախարար Աբբաս Արաղչին հեռուստատեսային հարցազրույցի ընթացքում շնորհակալություն է հայտնել հարևան մի քանի երկրների, այդ թվում՝ Հայաստանին: Որի մասին Իրանի ԱԳ նախարարը հայտնել է  իր թելեգրամյան ալիքում։

«Անհրաժեշտ եմ համարում երախտագիտություն հայտնել տարանցիկ և հարևան երկրներին, որոնք զգալի համագործակցություն են ցուցաբերել։ Նաև շնորհակալություն եմ հայտնում այն իրանցիներին, ովքեր օգնել են ծախսերի հոգալու հարցում։ Թեև ձեռնպահ կմնամ անուններ նշելուց, սակայն արտերկրում գտնվող բազմաթիվ իրանական ընկերություններ և անհատներ իսկապես սատար են կանգնել այս հարցում։ Այստեղ պետք է շնորհակալություն հայտնեմ Աֆղանստանի, Թուրքմենստանի, Ադրբեջանի, Հայաստանի, Թուրքիայի կառավարություններին և նույնիսկ Սաուդյան Արաբիային՝ ուխտավորների տեղափոխման հարցում համագործակցության համար։ Մեր հարևանները, այդ թվում՝ Պակիստանը, նույնպես զգալի օգնություն են ցուցաբերել»,— նշել է Արաղչին։

Աբբաս Արաղչին նաև նշել է, որ համագործակցություն է իրականացվել նաև մարդասիրական օգնության, մասնավորապես՝ դեղորայք և սննդամթերք ուղարկելու ոլորտում։

«Ցանկանում եմ ընդգծել, որ մենք ողջունել ենք ցանկացած երկրի, որն օգնելու պատրաստակամություն է հայտնել,  ոչ թե այն պատճառով, որ այդ օգնության կարիքն ունեինք, այլ որպեսզի աշխարհին ցույց տրվի Իրանի ժողովրդի հետ համերաշխությունը», — գրել է Իրանի ԱԳ նախարարը իր թելեգրամյան ալիքում։