Հրազդանի կիրճին Երևանի քաղաքապետարանը նախատեսում է տալ հատուկ պահպանվող համայնքային տարածքի կարգավիճակ

Նշվել է, որ սա կարևոր հանձնառություն է Հայաստանում անցկացվելիք COP17-ի շրջանակում։

Հրազդանի կիրճին Երևանի քաղաքապետարանը նախատեսում է տալ հատուկ պահպանվող համայնքային տարածքի կարգավիճակ։

Համապատասխան որոշման նախագիծն արդեն մշակվել է և առաջիկայում կներկայացվի Երևանի ավագանու քննարկմանը։

Այս մասին հայտնել է Երևանի քաղաքապետարանի բնապահպանության վարչության պետի պաշտոնակատար Սիրարփի Հայկազյանը՝Երևանի քաղաքապետարանի գործակարգավարական նիստի ժամանակ։ Նա ասել է, որ Բնապահպանության վարչության կողմից արդեն մշակվել է ավագանու որոշման նախագիծը, որը կներկայացվի առաջիկա նիստում։ Այս գործողության իրականացմամբ՝ օրենքի փոփոխությունների փաթեթի ընդունումից հետո Երևանը կդառնա առաջին համայնքը, որը կսահմանի բնության հատուկ պահպանվող համայնքային տարածք։ Նշվել է նաև, որ սա կարևոր հանձնառություն է Հայաստանում անցկացվելիք COP17-ի շրջանակում։

Սիրարփի Հայկազյանի խոսքով ինչպես բոլոր հատուկ պահպանվող տարածքները, այնպես էլ Հրազդանի կիրճը պետք է ունենա կառավարման պլան։

«Այդ նպատակով Ասիական զարգացման բանկի կողմից արդեն հայտարարվել է համապատասխան մրցույթ»,- տեղեկացրել է նա։