Հունիսի 17-25-ը Հայաստանում կանցկացվի «Արծիվ գործընկեր-2026» խաղաղապահ զորավարժությունը

Հունիսի 17-25-ը Հայաստանի Հանրապետությունում կանցկացվի ամենամյա «Արծիվ գործընկեր-2026» միջազգային խաղաղապահ զորավարժությունը։ Այս մասին հայտնում է ՀՀ պաշտպանության նախարարության մամուլի ծառայությունը։

Զորավարժությանը կմասնակցեն ՀՀ ԶՈւ խաղաղապահ բրիգադի 250 զինծառայողներ, Եվրոպայում և Աֆրիկայում ԱՄՆ ցամաքային զորքերի ու Կանզասի ազգային գվարդիայի 58 ներկայացուցիչներ, ինչպես նաև Ֆրանսիայի զինված ուժերի 24 և Հունաստանի զինված ուժերի 11 զինծառայողներ։

ՊՆ-ի փոխանցմամբ՝ զորավարժության ընթացքում կանցկացվեն խաղաղապահ առաջադրանքների նախապատրաստման և իրականացման վարժանքներ։

«Արծիվ գործընկեր-2026»-ի նպատակն է բարձրացնել միջազգային խաղաղապահ առաքելություններին մասնակցող ստորաբաժանումների փոխգործակցելիության մակարդակը, ապահովել կառավարման և մարտավարական հաղորդակցման ոլորտներում լավագույն փորձի փոխանակումը, ինչպես նաև ամրապնդել ՀՀ ԶՈւ խաղաղապահ ստորաբաժանման պատրաստվածությունը։

Պաշտպանության նախարարությունը նշում է, որ միջազգային խաղաղապահ գործողություններին նախապատրաստվող ստորաբաժանումները պարբերաբար մասնակցում են նմանատիպ համատեղ զորավարժությունների և վարժանքների գործընկեր երկրներում։