Հուլիսի 21-26-ը հանրապետությունում կդիտվի բարձր կարգի հրդեհավտանգ իրավիճակ․ Հիդրոմետ

«Հիդրոօդերևութաբանության և մոնիթորինգի կենտրոն» ՊՈԱԿ-ը զգուշացնում է, որ հուլիսի 21-26-ին Արարատյան դաշտում և Երևանում, Արագածոտնի, Կոտայքի և Վայոց ձորի նախալեռներում, ինչպես նաև Սյունիքի հովտային շրջաններում սպասվում է բարձր կարգի հրդեհավտանգ իրավիճակ։

Հուլիսի 21-ի ցերեկը և 26-ին հանրապետությունում կդիտվի առանց տեղումների եղանակ։ Հուլիսի 22-23-ը և 25-ին՝ առավելապես կեսօրից հետո, իսկ 24-ին՝ գիշերը և կեսօրից հետո, առանձին շրջաններում սպասվում է կարճատև անձրև և ամպրոպ, հնարավոր է նաև կարկուտ:

Քամին կլինի հարավարևմտյան՝ 2-5 մ/վ արագությամբ, իսկ ամպրոպի ժամանակ կդիտվի քամու ուժգնացում՝ 16-20 մ/վ speed-ով։ Բացի այդ, հուլիսի 21-26-ին Արմավիրի մարզում, Արագածոտնի և Կոտայքի նախալեռներում, իսկ 24-26-ը նաև Շիրակի մարզի առանձին հատվածներում երեկոյան ժամերին սպասվում է քամու ուժգնացում՝ 15-18 մ/վ։

Օդի ջերմաստիճանն առաջիկա օրերին էապես չի փոխվի։